Friluftsliv / Vind og Vatn

Vind og vatn er ei linje med kontrastar. Sånn er det når vinden og vatnet får bestemme

Hausten er fullpakka med moro. Året startar med fjellturar i nærområdet som byr på høge toppar med vill utsikt, ro rundt bålet og ein fredeleg leirplass. Me skal klatre, gå Via ferrata i Loen og sykle leikne stiar i fjellet. Og rett ved skulen ligg fjorden med fine muligheiter til å padle og segle med skulen si Collin Archer – skute.

Når regnet har fylt opp elvane på Voss finn me fram elvekajakken. Her skal me lære oss å manøvrere kajakken ned ei brusande elv frå den eine bakevja til den andre. Me kan garantere våt lugg, adrenalin og store smil.

På Stadt rullar det evige toget av bølgjer inn over stranda. Og på desse bølgjene skal me surfe. Me skal bli kjent med havet, kva som skaper bølgjer og korleis me kan ta vare på det. Med god instruksjon vil du raskt oppleve meistring og kjenne gleda over å suse innover på ei bølgje.

Når vinteren kjem og dei flotte Nordfjordfjella vert dekte med snø er det på tide å finne fram skia. Då skal me utforske dei gode topptur-muligheitene i nærområdet og få grunnleggande skredundervisning. Det vil bli dagsturar, overnattingar i snøhole, telt og hytter. Når vinden bles over vidda reiser me til Hardangervidda. Her får me god innføring i å fly kiten, og før du veit ord av det susar du bortover vidda.

Utover våren tek sola meir tak. Det blir solkrem, solbriller og fregner på nasen når topptursesongen går inn i påskeslusjen sin fasen. Og når sola verkeleg tek tak reiser vi avgårde til Europa på eit lengre surfeprosjekt i jakt på deilige bølger og det gode liv.

Det blir ei salig blanding av adrenalin og ro.

Prisen på linja finn du her