Friluftsliv / Ekspedisjon

Lange turar skapar eit sterkt samhald i klassen, og etter eit år på ekspedisjonslinja sit du igjen med mykje turerfaring.

Friluftsliv/ekspedisjon er ei linje der kunnskap om og nærleik til naturen står sentralt. Lange turar set djupe merke i ein, og vi håpar året vil vere eit utfordrande eventyr på mange plan.

Lengre turar og mange utedøgn krev at vi må improvisere og finne løysningar undervegs. Utstyr må reparerast og vi får sosiale utfordringar. Du vil lære å orientere, leggje opp vegval, bestemme leirplassar, kva du bør ha med og samtidig pakke lett.

Tørking av mat og turmat vil vi også arbeide med. God mat på lange og krevjande turar betyr enormt mykje. Det vil bli mange netter i telt og under open stjernehimmel.

Før og mellom dei lange turane våre vil vi reise på kortare turar. Her lærer vi det grunnleggjande i generelt friluftsliv, ferdsel på bre, kanopadling i elv, klatring og havkajakk. Basiskunnskapane vil kome i forkant av dei større turane, slik at vi er godt budde før vi reiser. I tillegg reiser vi til Sunnmøre på topptur og går på kjende fjell i området rundt Nordfjorden.

Langtur i haustfjellet
Vi går i fjellet og padlar muligens kano i elv eller havkajakk, avhengig av turmål. Tidlegare har vi kryssa fjellområde som Nordfjord, Sunnmøre, Femunden, Jotunheimen, Trollheimen og Dovrefjell. Du får prøve deg som turleiar og blir fortruleg med bruk av kart og kompass. Vi blir godt kjende med kvarandre, og får oppleve fjellet i sine finaste haustfargar.

Vintertur på ski
Om vinteren går vi ein lengre tur på ski i Jotunheimen. Vi kjem til å overnatte både i telt, snøhole og på hytte. Vi vil veksle mellom å ligge i basisleir og gå på toppar, og å vere undervegs.

10 dagars tur til Svalbard
Svalbard er ein del av Arktis som er fantastisk, men samtidig svært krevjande å ferdast i. Vi går ein lengre skitur på Nordenskjøldland der vi får brukt alt det vi har lært i løpet av skuleåret. Vi blir kjende med kvarandre på ein ny måte i det kalde, utruleg flotte landskapet. Du lærer korleis du går på tur på Svalbard med tanke på isbjørn og kulde. Vi vil også lære om Svalbard som samfunn og om øygruppa sin kultur, om historie og geologi.
Turar treng mykje planlegging. Vi lærer om gruppeprosessar og korleis vi får ei gruppe til å fungere best mogleg. Tidleg på vinteren får du opplæring i telemark og basisferdigheiter i vinterfriluftsliv. Vi skal innom mellom anna bekledning og utstyrslære. På skredkurs lærer vi snøkjennskap, skredvurdering og kameratberging ved skred.

Pris på linja finn du her