Kjære foreldre, føresette, søsken og vener!

Dette er sjansen de har venta på! I staden for berre å høyre om flotte opplevingar i Nordfjord, får de no sjansen til sjølve å vere med. Vi inviterer til eit maksimalt komprimert folkehøgskuleår, nemleg to døgn proppa med gode opplevingar.

Vi reknar med at de har fått mange rapportar frå utsendingen de har her hos oss. Om toppturar og bålkveldar, båtturar og kajakk, samarbeid og fellesskap, soveposesoving og stjernehimmel. Og så reknar vi med at de er litt misunnelege på alt dei har fått vere med på. Men gratulerer! De er med dette inviterte til eit ”minifolkehøgskuleår” frå 2. –  4. mai 2024.

Kven kan vere med?
Svaret er alle. Vi har ingen aldersgrenser, og turane blir tilpassa dei som er med. Parallelt med «Minifolkehøgskulen» har elevane sitt eige opplegg, så årets elevar kan ikkje vere med på desse aktivitetane.

Kvar og når
Turen startar torsdag om ettermiddagen på Nordfjord folkehøgskule, og sluttar når det er på tide å pynte seg til avslutningsfesten laurdag. Om du ikkje kan vere med på turen heilt frå starten, er det høve til å hoppe på undervegs! Alle aktivitetane blir rundt Gloppefjorden, altså i nærområdet til skulen. Vi kjem ikkje til å vere på skulen i særleg grad, for dei siste dagane på folkehøgskule er både intense og tårevåte. Og det er i grunnen best om elevane får vere for seg sjølve, utan innblanding frå alle oss andre.

Program

Torsdag
Kl 1630  Middag i matsalen.
Kl 1730 Samling i Storklasserommet med ein kopp kaffi. Offisiell start på ”minifolkehøgskulen”. Info om turane. Vi blir litt kjent, presentasjon, forventingar, kor mange vil på skitur/fottur på fredag …
1800: Fottur til samarbeidsløypa. Her får vi bryne oss på ulike problem som krev samarbeid.
Kvelds og overnatting i gapahuk.

Fredag
Morgon/føremiddag
For dei som er A-menneske vert det før frukost kaffi på bål ved gapahuken
Kl 0730 Vi går ned til skulen
Kl 0800 Frukost på skulen
Kl 0900 Skitur. På Vestlandet er det fantastisk å gå på ski i mai. I beste fall blir det skitur i shorts! Vi køyrer til Ryggjastøylen og går på Berdalsegga.
Kl 0900 Fottur. Om de heller vil gå på beina kan de det, då går vi frå skuleplassen på tur til Tysdadstøyen og kanskje vidare mot Haugsvarden.

Ettermiddag
1630 Middag på skulen
1730 Vi finn fram kajakkane og dei gamle Nordfjordbåtane. Så padlar og/eller ror vi på Gloppefjorden til gapahuken ved Nedrebø. Her blir det grillmat og bål. Også denne natta søv vi ute. Leirplassen ligg ikkje langt frå vegen, så det er òg mogleg å kome dit med bil.

Laurdag
Morgon
Etter frukost padlar/ror vi tilbake til naustet, og her blir det servert frukt. Vi er tilbake på skulen ca 2 timar før avslutningsfesten tek til.

Pris
Det er høve til å hoppe på turen undervegs. For å gjere det enkelt når det gjeld betaling, har vi delt turen i to, og du betalar for dei delane du er med på. Om du ikkje har høve til å vere med på heile turen, oppmodar vi deg likevel til å kome på fredag. Minifolkehøgskulen er ei flott oppleving!

Pris for heile kurset: kr 1.680,- (Barn/ungdom under 18 år 840,-)
Pris frå fredag til laurdag: kr 1.160,- (Barn/ungdom under 18 år 580,-)

Utstyr

• Ta med kopp, fat og bestikk.
• Du treng utstyr til overnatting ute: Sovepose, liggeunderlag og varme kle. Ei god hue og varme sokkar er eit varmt triks når du skal sove ute!
• Til skituren treng du fjellski, helst med stålkantar og fellar. Om du ikkje har fellar, kan du låne av elevar eller av skulen.
• Elles treng du kle for å vere ute i all slags ver. Vi håpar på sol og varme, men Vestlandet har òg ei våt og kald side som kan dukke opp… Du treng med andre ord både shorts, noko vasstett og noko vindtett, varme kle når du skal sitte stille, og ikkje så varme kle når du skal vere i aktivitet.
• Vi ordnar med ”hus” (dvs lavvo eller gapahuk), stormkjøkken, mat, kajakkar, båtar og flytevestar. Om du treng utstyr for å gjennomføre turen, er det berre å spørje elevane eller skulen. Vi lånar gjerne ut!

Vi gler oss til å vise fram naturen vår! Håpar vi ser deg!

Avslutningsfest

Vi inviterer sjølvsagt òg til ein skikkeleg avslutningsfest for alle dei flotte elevane våre og dokke som kjem hit!
Den er laurdag 4. mai klokka 13.00. Programmet varer i 1,5 – 2 timar, etterpå blir det servert middag til dokke alle!
Antrekket er bunad/dress/kjole/festfint for elevane, og vanleg/søndagsfint for alle oss andre.

Skuleåret blir ikkje avslutta før onsdag 8. mai. Det betyr at elevane skal vere att her på skulen nokre dagar etter avslutningsfesten – for å rydde, vaske, mimre, le og grine. Men vi håpar at flyttelasset reiser i samband med avslutningshelga..! Så vi oppfordrar med dette alle familiar om å komme køyrande med god begasjeplass, for vi trur flyttelasset ikkje flyttelasset akkurat har minka sidan august.

Meld deg på

Vil du/dokke være med på minifolkehøgskule og/eller avslutningsfest? Påmeldingsskjema for dei to arrangementa finn du under her!

– Påmeldingsskjema minifolkehøgskule

– Påmeldingsskjema avslutningsfest

Overnatting

Skulen er full av elevar, det betyr at vi ikkje kan tilby overnattingsplass her. Overnattingstipsa våre er:

• Gloppen hotell (Sandane)
• Gloppen camping (Sandane)
• Nordfjord hotell (Nordfjordeid, ei ferje og 15 minutt i bil)
• Reed camping (Reed, 15 minutt i bil)
• Byrkjelo camping (Byrkjelo, 20 minutt i bil)
• Skei Servicesenter, hytter (Skei, 40 minutt i bil)
• Thon hotell Jølster (Skei, 40 minutt i bil)
• Airbnb – sjekk Airbnb for fleire overnattingsstadar i bygda